OS SOCIALISTAS PROPOÑEN O APROVEITAMENTO DOS SOLARES ABANDONADOS MEDIANTE A COLOCACIÓN DE HORTOS URBANOS, PEQUENOS PARQUES OU ZONAS DE DESCANSO

·        Para levar a cabo o proxecto chegarase a acordos cos titulares das parcelas.

·        Cada contrato levará implícita unha cláusula que permita o rápido cambio de uso do terreo no caso de que, por exemplo, se requira para construir. 

 O Partido Socialista de Lalín quere rematar coa proliferación de solares urbanos abandonados e inutilizados, que representan un foco de suciedade, insalubridade e molestias para os veciños. Para tal fin propón a creación de hortos urbanos que permitan o aproveitamento destes emplazamentos e que ao mesmo tempo sirvan para adecentar e rehabilitar ditos espazos, dándolle un mellor aspecto á vila. En menor medida os solares abandonados tamén acollerán pequenos parques móbiles ou pequenas zonas de descanso.

 No casco urbano de Lalín afloran unha enorme cantidade de pequenos solares nos que non se construíu e que están completamente abandonados concentrando suciedade e significando un problema tanto para os cidadáns como dende o punto de vista estético xa que afean considerablemente a vila. O candidato dos socialistas á alcaldía de Lalín, Nicolás González Casares indicou que ditos terreos “constituen un espazo que pode ser aberto e aproveitado polos veciños e veciñas da Lalín, por exemplo, mediante a creación de hortos urbanos”. O alcaldable sinalou que se chegará a acordos cos propietarios das parcelas para poder levar a cabo este proxecto. Cada contrato levará unha clausula que permita o rápido cambio de uso do terreo, no caso de que se queira construir.

 Os hortos urbanos son a principal proposta de González Casares para a recuperación das zonas abandonadas. Tras limpar e adecuar os lugares cederánselles aos veciños e veciñas que demanden a súa utilización, para que, a continuación, poidan crear e xestionar a horta. Cada unha delas será dotada cun pequeno valado que funcione como elemento protector así como cunha pequena dependencia para gardar apeiros e coa súa correspondente toma de auga.

 Outra das formas de recuperar os solares abandonados será mediante a instalación de artiluxios de xogo infantís ou de elementos de descanso como bancos. A dotación destes compoñentes farase sempre de forma sinxela, de modo que poidan ser retirados con facilidade no caso de ser requerida a parcela para outro tipo de usos.