O PARTIDO SOCIALISTA SAE EN DEFENSA DA LINGUA E DENUNCIA A DESPROTECCIÓN Á QUE O PP SOMETE AO GALEGO

·Os socialistas fomentarán o coñecemento do trovador medieval Nuno Eanes Cerzeo a través de actos conmemorativos e de homenaxe.

· 

 Con motivo da celebración mañá do Día das Letras Galegas, que este ano honrará a figura do historiador, escritor, etnógrafo e político, Xosé Fernando Filgueira Valverde, nado en Pontevedra en 1906, o Partido Socialista de Lalín fai un chamamento na defensa do uso e a dignificación da lingua galega e denuncia a marxinación e a desprotección que o noso idioma vén sufrindo nos últimos anos froito da incomprensible política lingüística do Partido Popular.

O candidato Socialista á Alcaldía, Nicolás González Casares, recordou que o PP “mesmo ten argumentado falsamente que a lingua castelá está marxinada en Galicia, cando todos sabemos que o galego camiña cada día cara unha situación máis delicada”. González Casares tachou de “retrógadas” as políticas lingüísticas que dende o 2009 coa chegada de Núñez Feijoo á Xunta puxo en marcha o Partido Popular. “Unhas políticas que desprotexen o galego e que o están facendo desaparecer mesmo en moitos espazos da administración”, sinalou. Neste sentido o alcaldable socialista falou de impulsar a lingua tamén dende o eido municipal a través de políticas activas e mesmo a través de discriminacións positivas en diversos ámbitos da vida social, educativa e de servizos públicos “que lle permitan ao idioma galego ir pouco a pouco recuperando os ámbitos de uso que agora está a perder”.

 Por outro lado, Nicolás González Casares expuxo a proposta de homenaxear ao literato medieval nado na parroquia lalinense de Cercio, Nuno Eanes Cerzeo. Trátase dun trovador que desenvolveu a súa actividade literaria probablemente nos primeiros anos do século XII, alcanzando un bo recoñecemento na época, pero sendo practicamente descoñecido na actualidade. González Casares indicou que “trataremos de fomentar a  figura de  Eanes Cerzeo dando a coñecer entre os lalinense a súa figura e a súa obra e realizando actividades ou festexos conmemorativos e de homenaxe”.