OS SOCIALISTAS PROPOÑEN O AMAÑO DO CALELLO QUE UNE A RÚA LUÍS GONZÁLEZ TABOADA COA PRAZA DA IGREXA

·        González Casares considera “unha vergoña manter esta congostra no centro da vila” e propón a súa humanización acometendo canalizacións, reposicións de firme e instalando adecuados sistemas de iluminación.

·        O proxecto tamén contempla a apertura dun paso entre o rueiro e a Praza da Vila.

 O Partido Socialista de Lalín acaba de formalizar unha nova proposta urbanística. Trátase do adecentamento do calello que vai dende a Rúa Luís González Taboada ata a Praza da Igrexa. A humanización deste rueiro, coñecido popularmente como a congostra de Lalín, é  unha das demandas urbanísticas que a Agrupación Socialista de Lalín máis leva perseguido sen que, polo momento, se  conseguiran actuacióbns por parte do Concello.

 “É unha vergoña que exista un calello destas características en pleno centro de Lalín. O Goberno Local segue a preocuparse por outras cousas pero é inadmisible manter unha congostra así nesta zona”, dixo o candidato á alcaldía Nicolás González Casares en referencia ás deplorables condicións nas que se atopa o espazo, cun firme a base de escombros soltos e repleto de maleza. Por este motivo, os socialistas propoñen chegar a acordos cos veciños do lugar para efectuar  un completo adecentamento e aproveitamento da calzada.

 O proxecto de urbanización e humanización  exposto por González Casares terá como piares fundamentais o acondicionamento da zona mediante a canalización adecuada de augas, a  dotación dun firme axeitado e a fixación duns sistemas de iluminación apropiados, “para que entre outras cousas, deixe de ser un foco de insalubridade”, sinalou o candidato socialista. Por outro lado, o  plan tamén recolle a posible apertura dun paso que una o calello coa Praza da Vila. Como destacou Gonzalez Casares, “deste xeito posibilitaríase ademais o acceso directo dende a Rúa Joaquín Loriga  ata a Praza da Vila, a través das galerías internas que xa hai construidas”. Este novo acceso melloraría claramente as comunicacións internas no centro urbán e, así mesmo, dotaría aos locais ubicados no lugar dun entorno acondicionado que repercutiría en maiores oportunidades.