O PARTIDO SOCIALISTA RESERVARÁ PRAZAS PARA DISCAPACITADOS NOS PROCESOS DE CONTRATACIÓN PÚBLICA

·        As persoas con discapacidade  psíquica contarían con entre o 5  e o 10% dos postos, dependendo do número prazas ofertadas.

·        González Casares destacou a “inmensa labor social” desenvolvida por Aspadeza na súa visita ás instalacións do colectivo.

O candidato do Partido Socialista á alcaldía de Lalín, Nicolás González Casares, visitou hoxe as instalacións do colectivo Aspadeza (Asociación de Pais de Discapacitados Psíquicos  do Deza), ubicadas na localidade lalinense de Mouriscade. O socialista aproveitou a xuntanza con membros da directiva do organismo para presentar “unha das propostas de inclusión social nas que o partido máis está traballando nos últimos tempos, conscientes como somos do aumento que experimentou a desigualdade  e a exclusión no Concello”, explicou. A medida de inclusión social  relacionada coa discapacidade mental, consiste na reserva de prazas para este tipo de persoas en todos os procesos de selección pública de traballadores, sexan plans de emprego municipais, obradoiros ou oposicións. Segundo explicou González Casares, “todos os procesos de contratación contarán nas súas bases, dependendo dos postos que se oferten, con entre un 5 e un 10% das prazas reservadas para discapacitados psíquicos”.

 Asimesmo o candidato do PSOE explicou que o Concello contaría con persoas discapacitadas para realizar traballos ao longo de todo o ano, adaptados ás capacidades de cada un. O tamén Secretario Xeral dos socialistas de Lalín destacou neste aspecto que “os plans de inclusión laboral para  discapacitados psíquicos serven tamén para darlle  visibilidade a este tipo de persoas, así como facer que elas mesmas adquiran responsabilidades e se sintan  valoradas”.

 Por outro lado, o candidato socialista  nas próximas eleccións municipais salientou “a inmensa labor que Aspadeza está desenvolvendo nestes anos, axudando a moitas familias e a moitas persoas”. Neste sentido falou da necesidade de seguir dotando de axuda a este tipo de colectivos para que poidan dar  servizo ao maior número de usuarios posible”.

 Nicolás González  Casares agradeceu o bo trato recibido por parte do colectivo na visita ás instalacións de Aspadeza, onde puido comprobar de primeira man, xunto coa compañeira de partido Celia Alonso, “o bo ambiente que se respira  e o ben que están todos os beneficiarios do centro”.