Moción presentada no concello

Ó PLENO DO CONCELLO DE LALÍN

Os concelleiros do Grupo Municipal do PSdeG-PSOE no concello de Lalín abaixo asinantes,  presentan ó Pleno para o seu debate e aprobación se procede a seguinte

MOCIÓN

O sector do Taxi de Lalín está pasando nestes momentos, e xa ben pasando dende hai tempo, por momentos moi difíciles que incluso poñen en perigo a supervivencia de moitos destes traballadores na súa  ocupación. Os tempos de crise que fan que os usuarios busquen alternativas de transporte ó taxi menos cómodas pero mais baratas, o recente investimento na adquisición dos taxímetros (que on teñen ningún sentido en en concellos pequenos e zonas rurais como Lalín) e que supón ademais novos gastos engadidos (incremento no costo da ITV ou pagos á empresa subministradora do aparato por mantemento e para calquera modificación, por exemplo cambio de tarifas), o número elevado de licencias en vigor, un 35% por enriba do estipulado,  pero sobre todo a  competencia desleal tanto por parte de empresas de transporte que fan paradas para coller e deixar viaxeiros no casco urbano fóra da estación de autobuses como por parte de antigos compañeiros que deixan o taxi por xubilación ou venda da licenza e logo seguen facendo servizos clandestinos.

Se ben é certo que dende o concello non se pode facer moito por resolver a crise xeral deste país, si se podería  facer bastante na resolución dos outros dous problemas e este grupo de goberno non o fixo nin o quixo facer.

No Pleno ordinario do pasado 31 de marzo de 2015, os concelleiros do grupo do P.P. votaron todos en contra dunha moción  dos concelleiros socialistas (apoiada por toda a oposición) que pedía eximir ós taxistas das vilas como Lalín de colocar os taxímetros solicitando a adopción do seguinte acordo:

O Pleno do concello insta da Xunta de Galicia  a exención da obrigatoriedade da instalación do taxímetro nos concellos con tipoloxía similar á de Lalín, ben sexa a través dunha modificación da Lei 4/2013 antes citada, da súa contemplación  na normativa que a desenvolva, ou mediante calquera outro mecanismo legal aplicable.

E tampouco fixo nada a favor (mais ben en contra), na erradicación do intrusismo, sendo competencia plena do concello, nin tampouco na competencia desleal que supoñen determinadas empresas de autobuses que paran indebidamente no casco urbano. Os taxistas teñen denunciado en numerosas ocasións como ex compañeiros de profesión continuaban e continúan facendo servizos clandestinamente, e non se adoptou ningunha medida. Tamén se denunciou por escrito a dúas empresas de autobuses que facían paradas no casco urbano de xeito irregular, e nun caso a consellería abriu o oportuno expediente, pero no outro non actuou por que “segundo manifestacións da policía local de Lalín”, a empresa xa non facía esas paradas dende hai tempo, algo por certo que non se corresponde á realidade, pois calquera pode observar como todos os días de feira a empresa fai paradas para recoller e deixar viaxeiros na rúa matemático Rodríguez, producindo ademais atascos na circulación de vehículos.

Por todo o exposto, proponse ó pleno a adopción dos seguintes ACORDOS:

1º.-Inicio urxente dunha campaña de loita contra o intrusismo no sector do taxi implicando non so á Policía Local, se non tamén propiciando a colaboración doutras administracións a través da garda civil de tráfico, inspectores dos órganos competentes en materia de transportes da Xunta de Galicia, etc.

2º.-Control por parte da Policía Local para erradicar as  paradas das empresas de autobuses no casco urbano, fóra da Estación de autobuses, para recoller e deixar viaxeiros.

3º.-Estudar fórmulas para ir adaptando progresivamente o número de licencias de taxi de Lalín ó previsto na LEY 4/2013, de 30 de mayo, de transporte público de personas en vehículos de turismo de Galicia.

Lalín, 1 de abril de 2015  

Asdo.: Manuel González Aller                   Asdo.: Cristóbal Fernández Vázquez 

Asdo.:Marina Ferreiro Rodríguez