AS OBRAS DO PONTIÑAS SON UN SIMPLE PARCHE SEN UNHA MÍNIMA PLANIFICACIÓN

·        González Casares censurou o novo proxecto de amaño asegurando que non servirá para solventar as deficiencias e calificou de “estafa aos lalinenses” o proxecto executado o ano pasado, que non tivo resultados.

·        O candidato á Alcaldía de Lalín propón un plan integral de mantemento do Pontiñas, que contemple tanto directrices de xestión de infraestructuras, como ambientais e de seguridade.

  O candidato socialista á Alcaldía de Lalín, Nicolás González Casares, calificou de “parche” e “chapuza sen ningunha planificación” o novo proxecto de acondicionamento do paseo Pontiñas que o Concello está tramitando mediante procedemento negociado e sen publicidade e que contará cun presuposto de máis de 113.000 euros . O candidato do PSOE manifestou a sua sorpresa ao ver que “agora lles entrou a présa por amañar o Pontiñas cando o deixaron abandonado e desfeito durante tanto tempo”.  En referencia a isto apuntou que “ a proba do mal estado que sofre o parque faise patente nas 100 deficiencias que os socialistas atopamos no seu percorrido”.

 Por outra parte, González Casares volveu censurar o novo proxecto de Crespo, tal e como xa fixera semanas atrás, recordando que os desperfectos que se pretenden solucionar no plan actual xa estaban proxectadas no levado a cabo o ano pasado,  que tivo uns orzamentos de 117.000 euros. En referencia a dito proxecto sinalou o socialista  que “non se sabe moi ben como se executou, porque se gastaron os cartos e o parque seguíu igual de desfeito, así que está claro que se estafou aos lalinenses”.  Ademais, o tamén Secretario Xeral dos socialistas de Lalín asegurou que o novo proxecto tampouco servirá para deixar en boas condicións o Pontiñas e lamentou que “se gastasen máis de 200.000  euros nos dous plans de adecentamento e que ao final vaia seguir habendo deficiencias”.

 Nicolás González Casares aproveitou para explicar a proposta do PSOE de Lalín en canto á xestión e o mantemento do Pontiñas. Ésta consistirá, segundo explicou, na posta en marcha dun plan integral de xestión do Pontiñas que non só contemple o estado da infraestructura, senón que  tamén establezca unhas directrices de mantemento ambiental e de seguridade”.