MOCIÓN PRESENTADA POLO GRUPO SOCIALISTA

Ó PLENO DO CONCELLO DE LALÍN

Os concelleiros do Grupo Municipal do PSdeG-PSOE no concello de Lalín abaixo asinantes, presentan ó Pleno para o seu debate e aprobación se procede a seguinte

MOCIÓN

A empresa Gas Natural como é sabido estase implantando en Lalín co seu servizo de gas para consumo doméstico e industrial, para tal fin e coa colaboración do Goberno Municipal puxéronse en marcha medidas de difusión da súa implantación tal como charlas no Museo lalinense que incluso levaban nas cartas enviadas aos domicilios dos lalinense como invitación aos veciños a coñecer a proposta o membrete do noso Concello.

O alcalde asegurou neste Pleno e na prensa que a instalación desta empresa en Lalín melloraría o servizo aos lalinenses e introduciría competencia no servizo no que xa estaba instalada a empresa Repsol distribuidora de Gas Propano. Ademais nos seus primeiros anuncios o alcalde afirmaba que as empresas poñeríanse de acordo para utilizar a mesma rede e causar as menores molestias aos veciños e veciñas de Lalín.

Posteriormente os lalinenses asistiron asombrados a un estado de sitio nas súas rúas e beirarrúas cunhas obras que non foron ben planificadas e que dende logo motivaron moitas protestas. Con esas obras de canalización levantáronse moitas rúas que nalgún caso foron reparadas a cargo dos orzamentos municipais como é o caso da Rúa Pintor Laxeiro.

Recentemente os lalinenses soubemos que todas esas obras levadas a cabo na súa gran maioría ,salvo zonas que carecían de subministro, foron inútiles e as molestias aos veciños non supuxeron ningunha vantaxe para os mesmos pois atopámonos que as empresas Repsol e Gas Natural Fenosa chegaron a un acordo económico do que nada se coñece e que puxo en xogo as rúas dos lalinenses, polo que a segunda vendía a súa rede á segunda e en Lalín vai quedar unha sola operadora de gas.

Paralelamente desmontábase tamén o argumento esgrimido polo Goberno local relativo aos beneficios da competencia ,pois finalmente so vai haber unha empresa que monopolice o subministro de gas aos veciños e veciñas de Lalín. En definitiva as molestias causadas aos veciños, o levantar as rúas para logo reparalas con diñeiro público so serviu para substituír a empresa Repsol por Gas Natural no que pareceu mais un experimento de competencia entre dúas empresas tendo por reféns á cidadanía de Lalín.

Ante esta situación creada e a desorientación e falta de información que reclaman os lalinenses que en moitos casos descoñecen o que vai pasar co seu subministro e incluso xa haxa reclamacións por supostos abusos das empresas propoñemos a adopción dos seguintes

ACORDOS:

• Que dende o Concello de Lalín se reclame o inicio imediato dunha campaña que permita saber con detalle que vai pasar co subministro de gas e se informe dos custes e condicións con detalle.
• Que o Concello de Lalín habilite os medios necesarios para asesorar aos lalinenses neste asunto e tramitar as súas reclamacións cando sexa oportuno