Carta ao Sr. Concelleiro de Educación

Lalín,26 de febreiro de 2015

Estimado Conselleiro:

Como Vde. recordará, en decembro do 2008 o alcalde de Lalín escribía unha carta dirixida á entón Conselleira de Educación e Ordenación Universitaria Dona Laura Sánchez Piñón, carta que, por non poder estar presente o alcalde  na visita que dita conselleira fixo a Lalín para a presentación do proxecto do novo Xesús Golmar, foille entregada por Vde. persoalmente á conselleira.

Na misiva describíanse as “principais deficiencias e/ou necesidades” relacionadas coa educación en Lalín, a saber:

·         Construción do novo IES Laxeiro

·         Pacto Local en materia de educación

·         Construción dun novo colexio público na zona oeste de Lalín

·         Construción dun pavillón de deportes para o IES Ramón Aller Ulloa

Dende mediados do ano 2009, ata a actualidade, é dicir practicamente dende hai 6 anos, goberna o seu partido non so en Lalín, se non tamén na Deputación Provincial e por suposto na Xunta de Galicia, sen que en todo ese tempo se tivese nin a mais mínima noticia de ningunha desas catro necesidades que figuraban na carta, que parece que deixaron de selo ó cabo duns meses, en canto cambiou o goberno da Xunta.

Dado o seu recente nomeamento como titular da Consellería de Educación, e con motivo da súa  visita a Lalín en calidade de tal, aproveitamos para facerlle entrega dunha copia da carta citada anteriormente, para recordarlle as necesidades educativas principais de Lalín, necesidades das que, para poñerllo un pouco mais doado, eliminamos a terceira delas –a construción dun novo colexio público–, pois sempre defendemos unha redistribución do alumnado que evite tanto a masificación dos centros urbanos como a desaparición dos centros situados na zona rural, o que fai de todo punto innecesaria, ou cando menos non prioritaria, tal necesidade.

Pregámoslle por tanto, tal como facía o Sr. Crespo na súa carta, que teña en conta estas demandas, que non son unicamente do Grupo Socialista senón da comunidade educativa escolar lalinense e, en definitiva, dos veciños do noso pobo.

Unha aperta.

Asdo.: Manuel González Aller. Voceiro do Grupo Municipal Socialista