O PSDEG-PSOE DE LALÍN DENUNCIA A REDUCCIÓN DE HORARIOS NA BIBLIOTECA NUN MOMENTO DE MÁXIMA AFLUENCIA

-        González Casares faise eco das múltiples queixas de universitarios lalinenses nestes días.

-        “Hai persoal suficiente como para non ter que pechar nin reducir horarios nestas datas” lamentan os socialistas.

 Os socialistas lalinenses denunciaron hoxe “unha boa cantidade de queixas recollidas entre universitarios e outros estudantes como opositores que viron como se reducían drásticamente os horarios na Biblioteca Municipal neste tempo de Nadal”.

 González Casares sinala que “pecharon por completo os días 24 e 31 e reduciron ao mínimo os horarios de tarde en Nadal “ e afirma que “se entende que poidan pechar os festivos e reducir lixeiramente os horarios pero eses días son hábiles e súmanse aos festivos e son demasiados días concentrados nun curto espazo de tempo”. “Os usuarios destes días reclaman mais horas de apertura e ademais afirman que o estado da wifi é lamentable e faltan regletas nas que poidan conectar os seus ordenadores”

 Para os socialistas as queixas están xustificadas “pois son moitos os lalinenses que volven aos seus fogares no Nadal pero precisan seguir estudiando pois agora na Universidade os exames concéntranse no mes de Xaneiro e resulta que na Biblioteca do seu pobo non pensan para nada en eles”.

 Dende o PsdeG-PSOE local consideran que “hai persoal suficiente para rotalo e que o tempo de apertura polo Nadal non se vexa afectado mais que nos festivos” e pregúntanse se “na Biblioteca hai festivos a maiores ou o persoal ten horarios moi diferentes ao do resto do Concello de Lalín”.

 Para os socialistas mención aparte merecen as actuacións previstas “parécenos moi ben que na Biblioteca haxa actividade pero quizás nestas datas compría trasladala toda a mesma á carpa da Praza da Igrexa”.