RECLAMACIÓN PRESENTADA NO CONCELLO

Manuel González Aller e Cristóbal Fernández Vázquez, concelleiros do Grupo Municipal do PSdeG-PSOE no concello de Lalín , ante Vde. comparecen e

EXPOÑEN:

O proceso de selección de persoal por parte dos sucesivos gobernos do P.P. no concello de Lalín é unha sucesión continua e continuada de enchufismo, de amiguismo e de falta absoluta de transparencia, dinamitando en cada proceso selectivo os principios constitucionais –na teoría de obrigado cumprimento- de igualdade de oportunidades, mérito e capacidade e por suposto o principio de transparencia na xestión pública.

O “modus operandi” de todas estas contratacións é sempre o mesmo:

-Bases a medida da persoa que se quere contratar (nos primeiros contratos puntúanse exclusivamente aqueles aspectos de titulacións, de curriculum e de cursos de formación que posúe o candidato/a e nos posteriores puntúase moitísimo a experiencia en postos similares en concellos da mesma categoría do de Lalín –experiencia que agora xa teñen dos contratos anteriores- e tamén se puntúa moitísimo a entrevista, unha entrevista que se fai a porta pechada e da que non queda ningunha constancia nin escrita nin gravada en ningún dos soportes que permiten as novas tecnoloxías, e que en consecuencia ninguén pode cuestionar. Deste xeito aínda que por unha rara coincidencia puidese presentarse alguén coa mesma experiencia ou superior co elixido/a previamente, na entrevista puntúaselle moito menos e xa non ten ningunha opción)

-Escurantismo total na publicidade das convocatorias: Publícanse só nas páxinas locais dalgún periódico (Voz ou Faro), un anuncio case invisible polo seu pequeno tamaño, e con uns prazos de presentación de instancias entre 3 e 5 días, en moitos casos incluso días naturais (non hábiles), co que na maioría dos casos xa non se presentan moitos mais candidatos cas persoas destinatarias da praza.

-Participación nos tribunais de selección de persoal laboral do concello que xa entrou anteriormente por ese mesmo sistema, polo que vense na obriga de seguir colaborando para que entren as persoas que teñen que entrar e ningunha outra teña a mais mínima opción.

O resultado final vai a ser que toda esta xente consegue ser persoal laboral indefinido entrando totalmente pola porta de atrás con sucesivos contratos por obra con prorrogas totalmente ilegais como puxeron de manifesto recentemente os informes dos propios técnicos municipais.

O proceso de selección do persoal para o Lalín Arena está confirmando plenamente toda esas prácticas como se puxo xa de manifesto na praza do xerente, na que todo o pobo de Lalín puido comprobar a existencia de reunións previas do concelleiro de deportes coa persoa que ía a ser elixida, e como esa persoa tivo as mais altas puntuacións no proceso, e so a súa propia renuncia pública abortou unha elección totalmente anunciada dende un principio.

As bases das prazas restantes, volven a estar elaboradas como todas as anteriores como un traxe á medida para poder seleccionar á persoa sen ningún tipo de problemas:

-Anuncios da convocatoria de prazas nas páxinas locais perdidos nunha esquina do periódico que dificilmente poden atoparse.

-Tempo de presentación de instancias moi pequeño.

-Ningunha das fases é eliminatoria (como minimo o exame teórico debería ser eliminatorio), para garantir que o/a elixido/a non se quede no camiño).

-A entrevista puntúa tanto como o exame teórico ou como a fase de concurso e nada menos có dobre da experiencia profesional. E no caso dos monitores choca tamén que un aspirante pode ter todos os títulos universitarios que queira, todos os títulos nacionais de adestrador que poida haber, todas as mestrías deportivas que poida haber, que so obterá 3 puntos, pero na entrevista persoal pode levar 10, mais do triplo.

-A entrevista é a porta pechada e sen que quede ningunha constancia do seu contido, co que se anula calquera tipo de control posterior por parte da oposición.

-E finalmente resulta absolutamente inconcibible que no caso da praza de monitor de natación e de docencia de actividades deportivas se prime o intrusismo profesional admitindo como substituto da titulación correspondente a experiencia profesional.

Por todo o exposto, os concelleiros que subscriben solicitan desa alcaldía que proceda á suspensión dos procesos selectivos en marcha, e á elaboración dunhas novas bases de selección de persoal que realmente sirvan para elixir ós e ás mellores candidatos e candidatas, e non coma sempre para meter pola porta de atrás ós/ás que previamente designa o seu dedo.